Rambler's Top100
Молитвы

 

[win|dos|koi|iso|mac]     

 

Главная
Церкви
Книги
Молитвы
Календарь
Гостевая
Форум
Ссылки













 

КАНОН СВЯТОМУ МАКАРИЮ, МИТРОПОЛИТУ МОСКОВСКОМУ И ВСЕЯ РУСИ

 

Тропарь, глас 4. Первопрестольником преемниче и твердыи хранителю апостольским преданием, церкви столпе непоколебимыи, истине наставниче, отче всеблаженне Макарие, моли Христа Бога спастися душам нашим (дважды).

Слава и ныне. Богородичен. Иже от века утаенное и ангелом несведомое таинство, Тобою Богородице, земным явися Бог в неразмесне снятии воплощаемь. И Крест волею нас ради восприим, им же воскреси первозданнаго и спасе от смерти душа наша.

Канон, глас 8. Имыи краегранесие: Пою усердно святаго Макария. Песнь 1, ирмос. Вооружена фараона погрузи чюдотворяи древле, Моисейскии жезл крестообразно прорази, и раздели море. Израиля же бежаща, пеша ходяща спасе, песнь Богови возсылающа.

Запев: Святителю Христов Макарие, моли Бога о нас (поклон).

Песнь устен моих приими Христе Человеколюбче, и уясни ми язык, не поминая многия грехи моя. Да почту священными словесы угодника Твоего.

Запев. От источника премудрости Божия обогащься всеблаженне, и мя сотвори причастника премудрости, яко да достойно славлю тя святителю Макарие.

Слава. Юноты со старцы купно сошедшеся днесь поют Христа Благоподателя, иже даде нам таковаго угодника Своего блаженнаго Макария.

И ныне. Даеши богатно благодать Тебе поющим, и иже из Тебе Рождьшагося Превечнаго Слова, Мати неискусомужная, и согрешением оставление, сим просящи Пречистая.

Катавасия: Избави от бед рабы своя, святителю Христов Макарие, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).

Песнь 3, ирмос. Утвержеи небеса в начатце разумом, и землю на водах основавыи, на камени мя Христе, церковнем утверди. Яко несть свята, паче Тебе Человеколюбче.

Запев. Узкая врата и тесен путь вводяи в живот возлюбил еси, им же следуя во ограду паствы преподобнаго Пафнутия отшел еси, идеже многая лета во уставе пребыв жестоко житие искусил еси.

Запев. Смирение и послушание слезы и пощение богатно стяжал еси святе Макарие, теми же и ны обогати молитвами си.

Слава. Единаго Владыку из млада возлюбил еси, лествицею доброю на высоту возшел еси, тем и Христос тя избра и обители Пресвятыя Богородицы наставника сотвори.

И ныне. Иже горе со Отцем разумеваемыи, долу нас ради воплощается из Тебе, Всенепорочная Владычице, премножеством благосердия, един Благ и Человеколюбец.

Катавасия.

Седален, глас 4. Правоверными обогащься блаженне учении, мрачныя ереси вся развеял еси, и чюдес делатель явися Макарие, славен всеи Руси промышлением Божиим бысть. Тем тя верою чтем, яко святителя и ангелом единочестна.

Слава и ныне. Богородичен. Слово отчее Христа Бога нашего, из Тебе воплощьшееся разумехом Богородице Дево, едина чистая и благословенная. Его же ради непрестанно Тебе воспевающе величаем.

Песнь 4, ирмос. Ты ми Христе Господь, Ты же и сила ми, Ты ми Бог, Ты ми радование. Не оставль недра отча, но милостию Си нашу нищету посетив. Тем с пророком Аввакумом зову, силе Твоей Слава Человеколюбче.

Запев. Разумом Божиим исполняемь, явися приятелище Духа Святаго Макарие, и Того благодатию прият святительскии престол Великаго Нова града.

Запев. Достойно престол архиерейскии украсил еси светло. В доме неизреченныя Премудрости Божия Софии преименитыя пожил еси. Той причастники соверши ны.

Слава. Ни злато ни сребро ни драгии бисер возлюбил еси Макарие, точию книги чтомыя, яже от всех концев Руси, яко пчела мед от цветов собирал еси.

И ныне. Молися о рабех Твоих, Пренепорочная Богородице, из Тебе Воплощеннаго, яко Тя едину предстательницу нашу знаем.

Катавасия.

Песнь 5, ирмос. Вскую мя отрину, от лица Твоего Свете незаходяи, покрыла мя есть чюжа тма окаяннаго. Но обрати мя, и к свету заповедей Твоих пути моя направи молютися.

Запев. Отеческую любовь к пастве имея, полнощьныя лопьския страны светом Христовым просветише и шатания языческая угасише и искоренише.

Запев. Суетнии идольстии угодницы быша угодницы Христу твоими учении честными. Оляденевшая сердца плодоносна соделал еси Божиею благодатию.

Слава. Вопиет ти пастырю стадо твое, новая языческая шатания, яже Русь ныне смущают, разори и в ничто же силою Святаго Духа обрати.

И ныне. Иже едина словом плотию Слова рождьшая, избави молитвами Твоими, от сетей вражиих душа наша.

Катавасия.

Песнь 6, ирмос. Очисти мя Спасе, многа бо беззакония моя и из глубины зол возведи мя молюся. К Тебе бо возвах и услыша мя, Боже спасения моего.

Запев. Ят бысть от овец пажити Великаго Нова града и помазан мастию Духа Святаго на митрополию царствующаго града Москвы.

Запев. Твоими молитвами богоблаженне Макарие, низложися крепкии град Казань, и паде царство агарянское под нозе царя християнскаго.

Слава. Апостольскую похвалу Христу воздаше всеблаженне, о просвещении неверныя Казани, еи же святителя Гурия поставише, с ним же молися за ны Милостивому Богу.

И ныне. Тя оружие непобедимо, на враги предлагаем, Тя державу и надежу нашего спасения, Богоневестная имамы, Всенепорочная Владычице.

Катавасия.

Слава и ныне. Кондак, глас 2. Иже блаженству тезоименитаго святителя, православию наставника, Русскаго светильника и Троице угодника, Макария премудраго восхвалим, зане со ангелы предстоя присно молится непрестанно о всех нас.

Икос. Приидите вернии, пением и песньми духовными память совершающе, божествене возвеселимся сице поюще: радуися всеблаженне Макарие. Радуися святителем доброто. Радуися добродетелей светлое обиталище. Радуися мерило спасения священия правило. Радуися человече небесныи, земныи ангеле. Радуися яко присно молишися непрестанно о всех нас.

Песнь 7, ирмос. Божия схождения, огнь устыдеся в Вавилоне древле. Сего ради отроцы в пещи радованною ногою, яко во свете ликоваху, поюще, благословен Бог отец наших.

Запев. Гордая еретическая шатания соборне осудише святителю, вся же православныя поклонятися Первообразному укрепише, пред святыми образы воспевающия: благословен Бог отец наших.

Запев. Отеческое храня достояние, крестное знамение двема перстома благословляти и воображати якоже и Христос, соборне наставил еси, взывая: благословен Бог отец наших.

Слава. Мудраго хранителя преданием апостольским, истине наставника израсти тя земля Русская, да научиши вся воспевати: благословен Бог отец наших.

И ныне. Радуися Мати неискусобрачная, яже Бога Слова во утробе Своей вмещьши. И рождьши воплощенна Христа яко человека, купно же и Бога отец наших.

Катавасия.

Песнь 8, ирмос. Седмь седмицею пещь, халдейскии мучитель, благочестивым люте разжже. Силою же лучшею спасеных видев, Творцу и Избавителю вопияше, дети благословите, священнии воспойте, людие превозносите Его во веки.

Запев. Агнец нравом обретаяся, смирен кроток и милостив был еси святителю, и совершен разумом. Мы же дивяся твоим добродетелем и подвигом, Христа превозносим во веки.

Запев. Кожаныя умерщвеныя ризы отстрогав мечем воздержания, исткал еси от вышняго богословия ризу спасения, превознося Зиждителя во веки.

Слава. Ангел земныи на земли явися блаженне, ныне же небесныи человек житие имаши на небесех, превознося Господа во веки.

И ныне. Ияков Тя Богородице лествицу, пророчески разуме. Тобою бо на земли, Хвалимыи явися человеком, и поживе яко же благоизволи, Превозносимыи во веки.

Катавасия.

Песнь 9, ирмос. Удивися убо о сем небо, и земли ужасошася концы, яко Бог явися человеком плотию. И чрево Твое бысть пространнее небес. Тем Тя Богородице, ангел и человек чиноначалия величаем.

Запев. Рушиши ополчения безбожная блаженне, вооружься благоверия оружием, и мужеством дыша прехвальне. Совокупляеши же радуяся правоверных лики союзом духовным.

Запев. Имыи Христа заступника отче премудре Макарие, тебе послушающаго и божественных молитв тиха, Сего блаженне содеи любовию хвалящим тя.

Слава. Яко рай Божии благоухание источает гроб, идеже лежат честныя мощи твоя, и исцеление богатно подает всем, чтущим святую память твою.

И ныне. Из корене Давыдова прозябе, пророческаго Дево и богоотеческаго. Но и Давыда воистину Ты прослави, яко рождьши прорицаемаго Господа славы. Его же поюще величаем.

Катавасия.

Отпуст. Господи Исусе Христе Сыне Божий, молитв ради Пречистыя Твоея Матере и иже во святых отца нашего Макария, митрополита Московскаго и всея Руси, и всех ради святых помилуй и спаси нас, яко Благ и Человеколюбец. Аминь.

Стихера, глас 7. Троице Пресвятеи прилежно за ны молися Макарие, болезни и страсти вся прогнати, творящих верою и любовию память твою. Да избавлени бывше твоими молитвами от зол, Христа славим Избавителя нашего, Давшаго нам помощь и избавление. Тем ти радостно вопием прехвальне, даруй душам нашим мир и велию милость.

TopList

Rambler's Top100
be number one


Контактная информация: здесь
Комментарии, предложения: kirovold@ezmail.ru
Карта сайта: здесь   
Новости сайта: здесь